كشف الشاعر إيهاب عبد العظيم عن تفاصيل وكواليس أغنيته الجديدة "كأنه مجاش"، والتي تجمعه بالفنان رامي جمال في ثاني تعاون بينهما بعد نجاح أغنية "الجو جامد".

إيهاب عبد العظيم: رامي جمال أول اسم جه في بالي بعد ما الأغنية خلصت

وأكد إيهاب عبد العظيم في تصريح خاص لموقع "الفجر الفني" أن اختياره لرامي جمال لم يكن عشوائيًا، بل جاء بمجرد انتهائه من كتابة وتلحين وتوزيع الأغنية، قائلًا: "من أول ما خلصت واتلحنت كمان، وتحديدًا لما سمعتها متلحنة ومتوزعة وخلصانة، قلت على طول رامي جمال".

وأشار إلى أن الأغنية تحمل رسالة قوية تجاه الأشخاص الذين كانوا يومًا قريبين واختفوا فجأة دون مبرر، مضيفًا:" في ناس كانت جزء من حياتنا جزء مننا وجزء من يومنا وادينالهم كتير أوي، وفجأة بقوا كإنهم مجوش في حياتنا ولا يعرفونا، فبوصل لهم رسالة إن انتوا جاحدين وعندكم جبروت، وفي الآخر بقولهم انتوا أصلًا مش فارقين لي".

وعن سبب تميز رامي جمال كمطرب، أوضح إيهاب عبد العظيم:" قبل ما يكون مطرب فهو ملحن كبير جدًا وناجح وده بيخليه يعرف يختار كويس أوي الكلمة والجملة اللحنية والمزيكا الحلوة وبيشتغل على كل التفاصيل وبيعرف يعمل أغنية حلوة وبيعرف يختار أوي أوي، وكمان من النجوم اللي ناجحين وكل الأغاني بتاعته بتبقى تريند سواء سينجل أو البومات في دي حاجة مميزة جدًا وليه جمهور كبير، فنزولك معاه بغنوة انت بتعرف إن كل الناس هتسمعك".

إيهاب عبد العظيم: كان نفسي أعمل لرامي جمال حاجة دراما.. ولما خد كأنه مجاش كنت مبسوط جدًا

كما تحدث عن اختلاف هذا التعاون عن السابق، قائلًا: "التجربة دي مختلفة، لإني كان نفسي أعمل لرامي حاجة دراما، بحب رامي في الدراما جدًا، وكان نفسي أعمله حاجة دراما قوية، ولما خد كأنه مجاش كنت مبسوط جدًا، وإن شاء الله لما تنزل تعجب الناس وميكونش آخر تعاون بينا".

وحول مدة تنفيذ الأغنية، أوضح: "اتكتبت في ساعة أو اتنين، وسامر أبو طالب لحنها بسرعة، واديت الأغنية لمحمد ياسر اللي وزعها، وكل الشغل مخدش أكتر من خمس أيام، ولما رامي سمعها، خدها فورًا، ومحصلش فيها أي تغييرات من ساعة ما اتكتبت".

إيهاب عبد العظيم: "كأنه مجاش" كتبتها في الشارع والأغنية تمزج بين الحب واللوم والعتاب

وكشف الشاعر إيهاب عبد العظيم عن خلفية كتابته لأغنية "كأنه مجاش"، موضحًا أنها ناتجة عن مروره بتجربة شخصية، حيث قال: "أنا بحس إن معظم الكلام أو كل الكلام الدراما اللي بكتبه حتى لو أنا مش قاصد بيه تجربة شخصية بلاقي في الآخر بعد ما خلص أنا مريت بالتجربة دي، كأنه مجاش في موقف معين حصل خلاني كتبتها على طول حتى كنت في الشارع مش في مكان مركز فيه إن أنا اشتغل وأول كلمة طلعت كأنه مجاش".

وأكد أن الأغنية تنتمي إلى اللون الدرامي، وأنها تمزج بين الحب واللوم والعتاب، مضيفًا:" الغنوة دراما من العيار الثقيل كمان وفكرة مختلفة الفكرة فيها حب وعتاب ولوم".