أعرب الشاعر حسام سعيد عن سعادته الكبيرة بتعاونه للمرة الثالثة مع النجم رامي جمال في أغنية "بعدك أذاني"، المقرر طرحها خلال الأيام المقبلة ضمن ألبوم "محسبتهاش"، مشيرًا إلى أنها أغنية درامية تتحدث عن مشاعر الفراق والبعد، وتحمل رسالة واضحة للجمهور.

حسام سعيد يكشف كواليس أغنية “بعدك أذاني”

وقال حسام سعيد في تصريح خاص لموقع الفجر الفني: "هي أغنية دراما بتتكلم عن الفراق وعن البعد والرسالة اللي بحاول أوصلها للناس في الأغنية دي وفي أغلب أغانيا إن حاولوا دايما لما يبقى فيه فراق أو بعد سواء كان بقى فيه خطوبة مثلا فشكلت سواء جواز أيا كان يبقى فيه باب متوراب متقفلش الباب أوي يبقى فيه دايما فرصة للرجوع لأن الذكريات والمشاعر والحاجات دي مش بسهولة إن احنا نعوضها".

وأكد حسام سعيد أنه لم يكتب "بعدك أذاني" خصيصًا لرامي جمال، موضحًا: "أنا كتبت الكلام، وبعد كده بعته لعمرو الشاذلي، وعمرو لحنها، وبعدها سمعها رامي وعجبته جدًا، وبعدها نفذناها على طول، معلقًا: "المواضيع اللي فيها شجن وإحساس رامي بيقولها حلو أوي، فأنا أول ما عجبته الأغنية وقرر إنه ياخدها أنا اتبسطت جدًا، وعرفت إنه هيقولها حلو أوي وهتوصل للناس من خلاله بأحسن صورة ممكنة وهيصدقوها ودي أهم حاجة في أي أغنية بالنسبة ليا".

حسام سعيد: أغنية “بعدك أذاني”مخدتش وقت طويل في تنفيذها ومحصلش فيها أي تغيير

وأوضح حسام سعيد أن الأغنية خرجت بشكلها النهائي من أول مرة، دون أي تعديلات، معلقًا: "مخدتش وقت طويل، ومحصلش فيها أي تغيير، وأغلب شغلي مش مستوحى من تجربة شخصية، أنا بحاول أعبر عن كل الناس والمواقف، ممكن أبقى حزين وأكتب حاجة رومانسية أو العكس، فالموضوع كان إحساس جوايا وموقف اتخيلته وكتبته وده اللي بعمله في معظم شغلي".

حسام سعيد: رامي جمال بيختار الكلام اللي يلمس القلب

وتحدث حسام سعيد عن سر الكيميا بينه وبين رامي جمال، قائلًا: "بحب رامي جمال جدًا؛ لإن عنده ذوق وحس فني عالي جدًا، كمطرب وكملحن مش أي كلام يعجبه، فهو من الناس اللي بتدقق جدًا في الكلام وبتختار الكلام اللي يلمس القلب لأن هو بيقدر يوصله للقلب وده اللي بيخلينا متفقين، لأن ده برضو التارجت بتاعي ودي طريقتي في الشغل وهنا بتحصل الكيميا إن إحنا بنبقى متفقين في نفس التفكير والتعبير عن الحب والمشاعر فده اللي بيخلي في كيميا حلوة بينا ونجاحات ما بينا، ولسه كمان اللي جاي إن شاء الله هيبقى أحلى كمان من اللي فات".

سبب تكراره للتعاون مع رامي جمال

وعن سبب تكراره للتعاون مع رامي جمال، قال: "أنا لما بنجح مع مطرب ببقى حابب إن أنا أنجح في الأغنية اللي بعدها أكتر من النجاح الأول بكتير ده بتبقى مسؤولية إضافية طبعًا إن خلاص بيبقى فيه ثقة مع المطرب والجمهور كمان واثق في شغلك معاه انت بيبقى عليك مسؤولية طبعا وأنا بحب جدًا جدًا تكرار التعاون، محبش أبدا اشتغل مع مطرب أغنية وخلاص أحب يبقى في ما بينا ثقة وتجديد تعاون طول الوقت".

واختتم حديثه قائلًا:" أنا رامي من الناس اللي بحبها جدًا من قبل ما اشتغل معاه وأنا حابب اشتغل معاه وحابب إن أنا اعمل معاه شغل كتير ويبقى ليا وجود في تاريخه ويبقى لينا بصمة مع بعض، فالحمد لله ابتدينا بلحظة بعادك وحققت نجاح كبير وكانت بداية قوية لينا وكملنا بحياتي الحلوة، وإن شاء الله اللي جاية بعدك اذاني وفي حاجات جاية كمان بعدها، فأنا حابب رحلتي معاه ومتوسم لها خير ونجاح كبير، ولسه اللي جاي أهم وأحلى بكتير إن شاء الله، وربنا يكرمنا وننجح دايما مع بعض".